Vawiinah hian thi ta la...!?

Hlim takin kan nitin nun kan hmang a, chutih lai chuan kan beisei ngai loh thihna chuan thang awk angin min lo tlakbuak thut a.

Nimin lawka hlim taka kan nuihpui kha tunah chuan mitthi a lo ni ta reng mai. Hetiang thu lungchhiatthlak hi he khawvel mihring 7 billion aia tam mah chen meknaah hian nitina thleng reng chu a ni.

Thihna hi eng nge a nih le? Mihringte helna avangin thihna hi alo awm a ni tiin Bible-in min hrilh a, thlarau thihna chauh ni lovin taksa thihna (physical death) pawh hi sualna vang niin a lang. Kan nâ a, chung chu kan tihdik loh leh midang sualna avanga kan chunga lo thleng an lo ni fo thin. Heng atang hian thuawih hi dam reina (hriselna) a ni tih Bible zirtirna mawl tê te hi a dikzia leh a rilzia ngaihtuah zui tlak tak a ni.

Kan dam chhung hun rei lohzia ngaihtuah hian kan nun dan kawngah duhthlanna kan hman thiam a pawimawh hle mai. Sual bumna lian leh ril, hriatthiam har tak takten khawvel leh keini mihringte hi min hmachhawn reng a, bona tur tam tak a awm.

Hun tha kan nei e. Vawiinah hian ka thi thei a ni, tiin kan ngaihtuah ngai em? Thil ropui tak chu - Thihna hnehtu Lal Isua Krista vuan chungin he sual (thihna) hi kan lo hneh ve thei reng mai tih thu hi! Ringtu tan he taksa thihna (physical death) mai hi chu kawngkharpui, 'hnehna kawngkhar' zawk a ni e.

Tupawh hian thihna kawngkhar hi kan la paltlang ve ngei dawn a, hnehna kawngkhar a ni thei a, thih nawn lehna kawngkhar pawh a ni thei bawk...chu chu tuna kan duhthlannain a hrin chhuah tur chu a ni e. Bible thu angin...engkimah fimkhur chung zelin, tawngtai fan fan chungin Pathian lam hi i hnaih zel ang u.

(He thu hi min hringtu ka chunnu duhtakin be khawvel ata min kalsan ni xhampha vawikhatna (Nov. 8, 2015)-a ka rilrua lo lang a ni a, thui tak a ni a, blog-a post dawnin ka siamrem a ni).