Krismas a hnai a, khua pawh a vawt var var tawh hle mai. Nu
thenkhat, fate thil thar leisak ve ngei tumho pawh tan lain an phe dawr dawr a,
khaw vawt tak karah pawh an chawl thei lo, tar chak lote tan erawh khaw vawt
chu a chimawm duh ngawt ang le.
Zanriah ei a hun hnai hle tawh a, mipa naupang pakhat, kum 11
mi, fel tawh tak mai chuan tukverh atang chuan an thenawma a kawm ve thin, amah
ang rual, fel ve tak a nu nena bazar-a an kal lo haw, hlim tak maia a zuang lîm
vel lai chu a lo en reng a, a kut chuan an thil lei tlem azawng chu a khai ve
bawk a, tichuan an in chhunga an luh thleng chuan a thlir reng a. An luh tak
hnuah chuan a thawmhnaw thar tur, a bikin a kawr thar tur chu a ngaihtuah zui
ta neuh neuh a.
Nichina a thianpa hlim taka a awmna chhan pawh kha, a hma daih atang
tawha a thawmhnaw thar tur an lei tur thu a lo hrilh tawh, a taka lo thleng a
nih vang a ni tih a hria a. Ani pawhin naktukah a nu nen an lei ve dawn a ni.
Chuvang chuan eng chi nge a thlan ang, a
nu chuan a duhzawng tak lei a lo tiam tawh si a…a rilru chu a buai hle mai.
Chutia a inngaihtuah lai chuan chaw ei turin a U chuan alo ko va, a thawmhnaw thar
tur ringawt ngaihtuah chungin chaw ei chuan a tho ve ta a.
A tukah chuan a nu nen chuan bazar-ah kalin a thawmhnaw tur
pawh chu an lei ve nghal a, a duhzawng tak a thlang a, ina an haw hnua chuan Krismas
tuka hak chuan chu a chak zek zek tawh mai, a’n ha chhin vel a, nuam hi a ti em
em a.
Krismas chu a lo thleng a, tichuan thawmhnaw thar, hak a chak
em em tawh chu ha chhuakin a thiante zingah chuan a awm a. A ruk chuan a
thawmhnaw thar chu a inchhuanpui ve em em a. Nuam an ti hle mai.
Krismas te a lo zo va, Chawlhnia Sunday School-a inkhawma a
Krismas kawr thar, mawi a lo tih em em, a lo inchhuanpui ve tak thin chu hak a tui lo ta viau mai a, an thenawma a thianpa erawh kha
chuan kamis var lam, smart pangngai tak a lei kha a ni a, tun thlengin Chawlhniah
tawh hi chuan a la ha ve ziah a, a la mawipui hle a. Ani erawh chuan a
thawmhnaw lei chu a mawi lo a tiin a thar laia a duhnate kha a nei tawh lo va,
a hnuah phei chuan hak chhuah chu a zak ta hle a, an thawhnaw bawmah a dah tawm
ta vel mai mai a. A thianpa erawh kha chuan a kum leh Krismas-ah pawh a kawr lei
chu a la mawipui reng thung a ni.
Duhthlan thiam a pawimawh mai bakah, mahni kan inngaih ang
hian mite hian min lo ngai lem lo thin tih hi hriat loh chuan he mipa naupang ang
mai hian a hun lai chuan lo hlimpui ve viau mah ila, hun a lo rei chuan miten
min hmuhsit phahnaah a lo chang thin a ni. Mi inngaisang leh indahsang mi chu anmahni
ngaihtuahnaah chuan mite chunga leng, midangte chu nêp tak, thil hre ve tak tak
lo, thing tak, mawl tak, changkang lo leh buai mai tur niin an ngai thin a,
miten an lo thlir danah erawh chu mi chu mi chapo a ni a, mite a hnuaichhiah
thin avang chuan mite chuan an haw ru vek zawk a, hun a rei phei chuan biak
that pawh a hlawh tawh lo va, endawng hial a ni thei a ni. Chuvangin mahni
indahsan chin tawk te, inngaihhlut bansan leh a hun leh a hmun azira thiltih
thiamna te hi mihringte hian kan mamawh reng a ni.
Bible-a Pathian mi hman lal leh zawlnei leh Lal Isua leh
tirhkohte ngeiin an sawi thute hi kan tana tha tur vek an ni a, tun dam chhung
mai pawh ni lo, chatuan hawlhtlanga thupek ropui te an ni a, heng zawmna tel lo
chuan (zawm a har si lo…) khawiah pawh kan thlamuangin kan nun hi a dikin a
hlim famkim thei tak tak ngai lo vang. A do zawnga kal hi sual hnathawh, Setana
tum ber a ni a, chu erawh chuan hremhmunah a hruai lut ang.
Tupawh inngaihlu apiang an tlawm ang a, tupawh inngaitlawm apiang
chawimawiin an awm ang. – Matthaia 23:12
Comments
Post a Comment